మహిళా సాధికారతకు సైన్యం అండ.. సరిహద్దులో ప్రత్యేక కేఫ్ ఏర్పాటు

తూర్పు సిక్కింలో భారత సైన్యం ఒక ప్రత్యేకమైన కార్యక్రమానికి శ్రీకారం చుట్టింది. ప్రఖ్యాత బాబా హర్భజన్ సింగ్ మెమోరియల్ టెంపుల్ సమీపంలో, సముద్ర మట్టానికి 13,000 అడుగుల ఎత్తులో పూర్తిగా మహిళలే నిర్వహించే కేఫ్‌ను ఏర్పాటు చేయడంలో కీలక పాత్ర పోషించింది. మహిళా సాధికారత, సరిహద్దు పర్యాటకాన్ని ప్రోత్సహించడమే దీని ముఖ్య ఉద్దేశం అని అధికారులు తెలిపారు.

గౌహతిలోని డిఫెన్స్ పబ్లిక్ రిలేషన్స్ కార్యాలయం ఆదివారం విడుదల చేసిన పత్రికా ప్రకటన ప్రకారం, త్రిశక్తి కోర్ ఆధ్వర్యంలో ఈ కార్యక్రమాన్ని రూపొందించారు. వ్యూహాత్మకంగా కీలకమైన సరిహద్దు ప్రాంతాల్లో పర్యాటకాన్ని, సామాజిక-ఆర్థిక అభివృద్ధిని ప్రోత్సహించేందుకు సైన్యం చేపట్టిన 'రణభూమి దర్శన్' కార్యక్రమంలో భాగంగా ఈ కేఫ్‌ను ప్రారంభించారు.

ఈ కేఫ్‌ను పూర్తిగా స్థానిక మహిళా బృందం నిర్వహిస్తుంది. దీనివల్ల మారుమూల పర్వత ప్రాంతాల్లోని మహిళలకు జీవనోపాధి అవకాశాలు గణనీయంగా మెరుగుపడతాయని అధికారులు తెలిపారు. బాబా హర్భజన్ సింగ్ ఆలయాన్ని సందర్శించే పర్యాటకులకు కూడా మెరుగైన సౌకర్యాలు అందుబాటులోకి వస్తాయని వివరించారు. కఠినమైన భూభాగం, వాతావరణ పరిస్థితులు ఉండే ఇలాంటి ప్రాంతాల్లోని మహిళల్లో స్వావలంబన, వ్యవస్థాపక స్ఫూర్తిని ఇది ప్రతిబింబిస్తుందని పేర్కొన్నారు.

ఈ చొరవ పర్యాటక ప్రోత్సాహాన్ని జీవనోపాధితో అనుసంధానిస్తుందని, స్థానిక ఆర్థిక కార్యకలాపాల్లో మహిళల భాగస్వామ్యాన్ని బలోపేతం చేస్తుందని సైన్యం తెలిపింది. సరిహద్దు ప్రాంతాల్లో సైన్యం, పౌరుల  మధ్య పెరుగుతున్న భాగస్వామ్యానికి ఇది నిదర్శనమని, ఈశాన్య ప్రాంత ప్రజలతో సంబంధాలను బలోపేతం చేసేందుకు తమ నిబద్ధతను ఇది చాటుతోందని అధికారులు వెల్లడించారు.